На 18.09.2016 година во манастирската црква на свети Јован Крстител во Капиштец, Скопје, со Архиерејска Божествена Литургија со која чиночалствуваше Неговото блаженство Архиепископот охридски и македонски г.г. Стефан и свештенослужители од Скопската православна епархија, а во присуство на г. Никола Јанкуловски ректор на Универзитетот „Свети Кирил и Методиј“ во Скопје, проф. д-р Ѓоко Ѓорѓевски декан на Православниот богословски факултет „Свети Климент Охридски“, декани и продекани од УКИМ, како и студенти од богословскиот и други факултети, започна првиот академски час на студентите од Скопскиот Универзитет.
По отслужената Литургија со Молебен судентите заедно со своите професори се помолија за призив на Светиот Дух и благословена нова академска година.
…Ѓаконот: За да испрати на овие студенти дух на премудрост и разум, да им го отвори умот и устата, и да ги просвети нивните срца за усвојување на поуки и добрите науки, да се помолиме на Господа.
Народот: Господи помилуј.
Ѓаконот: За да всади во нивните срца никулец на премудрост, страв од Бога, и со него да ја отстрани од нивните срца младешката лекомисленост, да им го просвети умот, за да бегаат од злото и да прават добро, да се помолиме на Господа.
Народот: Господи помилуј.
Од Молебенот
