На 3 април 2025 година, Православниот богословски факултет „Св. Климент Охридски“ во Скопје беше домаќин на предавањето на д-р Бетан Вилис, една од учесничките на програмата „Конекција Оксфорд“. Предавањето, кое го привлече вниманието на студентите и професорите, беше на тема: „Како да се размислува со смирение на умот“.
Преку интерактивна дискусија со присутните, д-р Вилис ја истакна потребата за интеграција на духовната мудрост во современите академски процеси, при што смирението се појавува како важен елемент за градење здрави и продуктивни академски заедници.
Настанот беше организиран од Балканскиот институт за вера и култура, во соработка со Македонското библиско здружение и Православниот богословски факултет „Св. Климент Охридски“ – Скопје.
Програмата „Конекција Оксфорд“, која се реализира од 2011 година, има за цел да ги поврзе македонските академски институции со водечката светска високообразовна институција – Универзитетот Оксфорд. Преку оваа програма, досега, повеќе од 100 професори, предавачи и докторанти од Универзитетот Оксфорд имале можност да ги споделат своите истражувања со македонските студенти, професори и академици. Со тоа се овозможува директна интеракција на македонската академска заедница со истакнати научници од различни области.
Православниот богословски факултет останува посветен на организирање вакви значајни активности кои придонесуваат за развојот на академската заедница.
