На 24 октомври 2024 година, во свечената сала на Музејот на македонската борба за самостојност, се одржа свечена прослава по повод 30-годишнината од основањето на Македонското библиско здружение. Ова значајно чествување беше одбележано со присуство на многубројни гости, меѓу кои и професори, академици и претставници на религиозни и општествени организации, кои имаат дадено значителен придонес во развојот и работата на Здружението.
На свеченоста, пред присутните, со пригодни говори се обратија Неговото Блаженство, Архиепископот Охридски и Македонски г.г. Стефан, Неговото Преосвештенство, Епископот Хераклејски г. Климент, г. Џорџ Сохос – претставник од Обединетите библиски здруженија и Генералниот Секретар на Македонското библиското здружение – проф. д-р Ѓоко Ѓорѓевски.
Работата на Македонското библиско здружение низ годините е длабоко поврзана со придонесот на професорите од Православниот богословски факултет. Поранешниот Генерален Секретар – проф. Петко Златески цели 25 години успешно раководеше со Здружението и со својата визија ги постави темелите за многу од проектите кои денес се спроведуваат. Сегашниот Генерален Секретар, проф. д-р Ѓоко Ѓорѓевски, го продолжува овој пат и успешно ги раководи тековните проекти и активности на Здружението, внесувајќи нови идеи.
Особено место во работа на Македонското библиско здружение имаат професорите од Православниот богословски факултет: д-р Дарко Анев и д-р Виктор Недески, кои со својата експертиза и посветеност ја поддржуваат мисијата на Здружението, давајќи го својот продонес во современиот превод на Новиот Завет и Псалмите – проекти кои се од клучно значење за зачувување и пренесување на библиската мудрост на современ македонски јазик. Во своето промотивно обраќање, Епископот Хераклејски г. Климент нагласи дека преведувањето на овие сакрални текстови е сложена и предизвикувачка задача која бара извонредна лингвистичка и духовна посветеност. Оваа комплексна работа не само што овозможува ново разбирање на текстовите, туку и гради жива врска помеѓу читателите и Светото писмо.
Уште еден важен проект на Библиското здружение за превод на новозаветните текстови на македонски знаковен јазик е успешно координиран од страна на д-р Анета Јовковска – професор на Православниот Богословски факултет.
Оттука, одбележување на 30-годишнината од постоењето на Македонското библиско здружение воедно е и потврда за долгорочниот и значаен придонес на професорите од Православниот богословски факултет во работата на Здружението. Тие, со својата посветеност и научна работа, директно влијаат врз општеството и духовниот живот во Македонија.
