На 14 октомври 2019 година, во просториите на Факултетот, свечено беше потпишан Договор за соработка помеѓу Православниот теолошки факултет „Свети Климент Охридски“, придружна членка на универзитетот „Свети Кирил и Методиј“ во Скопје и Католичкиот богословски факултет од Универзитетот во Загреб. Договорот за соработка го потпишаа деканите на двата факултета, проф. д-р. Ѓоко Ѓорѓевски и проф. д-р. Марио Цифрак, а на свеченото потпишување на Договорот присуствуваа и поглаварот на Македонската православна црква, Неговото Блаженство, Архиепископот Охридски и Македонски г.г. Стефан, ректорот на универзитетот „Свети Кирил и Методиј“ во Скопје, проф. д-р Никола Јанкуловски, д-р Киро Сотојанов, бискуп скопски и епископ струмичко-скопски од Католичката црква, заедно со продеканите на двата факултета: проф. д-р Милан Ѓорѓевиќ и доскорешниот продекан проф. м-р Петко Златески, како и продеканите од Католичкиот богословски факултет од Загреб, проф. д-р Ружица Разум, продекан за настава, проф. д-р. Ненад Маловиќ, продекан за меѓународна соработка и доцент д-р Анто Баришиќ, продекан за организација и подрачни студии.
По потпишувањето на Договорот за соработка, деканите, архиепископот Стефан, ректорот Јанкуловски и бискупот Стојанов одржаа кратки пригодни говори во кои го изразија своето задоволство и радост за започнувањето на меѓуфакултетската соработка, со надеж дека таа ќе биде богата и плодна и од значаен придонес во унапредувањето на меѓусебните односи. Договорот предвидува соработка во форма на размена меѓу професорите и студентите на двата факултета.
