Од 25 до 27 ноември 2025 година на островот Крф, под покровителство на Митрополитот Нектариос и во соработка со манастирот Ватопед, се одржа осмиот симпозиум на IAODT на тема „Символот на верата како поука на верата“. Настанот беше посветен на 1700-годишнината од Првиот вселенски собор во Никеја.
На симпозиумот учествуваа 22 професори од 7 земји. Учесниците имаа можност да се поклонат пред моштите на свети Спиридон Тримитундски, учесник на Соборот во Никеја, како и да сослужуваат на светата Литургија во храмот „Свети Спиридон“.
На отворањето се обратија Митрополитот Нектариос, претседателот на IAODT, проф. д-р Порфириј Георги, и претставник на манастирот Ватопед. Во своето обраќање, проф. Георги ја истакна важноста на Никејската вера како темел на единството и идентитетот на Православната Црква.
Програмата продолжи со три дена богата научна размена и посети на значајни манастири на островот. На симпозиумот учествуваше и презвитер доц. д-р Илче Мицевски-Игнат, в.д. декан на ПБФ „Св. Климент Охридски“ – Скопје, со реферат на тема: „Актуелноста на верата во богочовечноста на Христос наспроти современиот неоаријанизам“.
На крајот беше потврдено дека Никејскиот Символ на верата и денес останува непоколеблива основа на православната теологија и сведоштво за смислата и целта на христијанскиот живот.
