На 17 мај 2023, Фондацијата Конрад Аденауер, во соработка со Православниот богословски факултет „Свети Климент Охридски“ и Факултетот за исламски науки од Скопје, го организираше настанот „Меѓурелигиска училница“. На овој настан учествуваа студентите од теолошките факултети и други заинтересирани граѓани, со цел да се поттикне значајна размена на идеи и искуства.
На меѓурелигискиот час беа присутни дваесет студенти од Факултетот за исламски науки во Скопје и Православниот богословски факултет „Св. Климент Охридски“ – Скопје. Настанот започна со обраќање на претставникот од Конрад Аденауер г. Роберт Јанев. Професорите д-р Хасан Џило и доц. д-р Дарко Анев ја истакнаа важноста од религискиот дијалог и соработката меѓу овие две високообразовни институции.
Во рамките на програмата, студентите ги посетија Архиепископскиот соборен храм „Св. Климент Охридски“ и Мустафа-пашината џамија во Скопје. Професорите Џило и Анев ги запознаа студентите со основните верски симболи, традиции и значењето на овие храмови во исламската и христијанската религија. Студентите имаа можност да поставуваат прашања за верата, молитвата и богослужбата во двете религии.
