Проф. д-р Виктор Недески учествуваше на меѓународен истражувачки настан во рамките на COST Action PRAYTICIPATE

Во периодот од 22 до 26 јуни 2026 година, проф. д-р Виктор Недески, продекан за меѓународна соработка на Православниот богословски факултет „Св. Климент Охридски“ – Скопје, учествуваше на меѓународниот научно-истражувачки настан „Prayer and Setting: Space, Place, Movement, Ritual, Service and Text: A Participatory Pilgrimage-and-Prayer-Immersion Research Skills-Sharing Event“, кој се одржа во Албанија во организација на LOGOS University College, во рамките на COST Action PRAYTICIPATE.

Настанот обедини 13 универзитетски професори и истражувачи од Обединетото Кралство, Швајцарија, Шпанија, Германија, Полска, Македонија, Грција, Албанија и Србија, кои преку интердисциплинарен пристап ги разгледуваа современите методологии за проучување на молитвата, поклоништвото, литургискиот простор, ритуалот, движењето и богослужбените текстови.

Во текот на тридневната програма учесниците реализираа теренски посети на повеќе значајни христијански и исламски поклонички центри во Албанија, меѓу кои манастирот на Свети Антониј од Падова и пештерата на Свети Власиј во Лач, текето на Сари Салтик во Круја, средновековниот Берат со моштите на Светите Седмочисленици и Свети Никодим, како и џамијата Ет’хем-бег и Светскиот центар на Бекташкиот ред во Тирана. Практичниот дел беше надополнет со научни работилници и дискусии посветени на методолошките пристапи во проучувањето на молитвата како духовен, културен и просторен феномен.

Со своето учество, проф. д-р Виктор Недески го претстави Православниот богословски факултет „Св. Климент Охридски“ – Скопје во рамките на меѓународната COST мрежа PRAYTICIPATE, придонесувајќи кон зајакнувањето на меѓународната соработка на Факултетот и воспоставувањето нови академски партнерства со истражувачи и високообразовни институции од повеќе европски земји.