Со особена чест и задоволство споделуваме дека во текот на летниот семестар од академската 2025/2026 година, на покана на Универзитетот во Мачерата (Италија), д-р Марија Гиревска реализираше дванаесетнеделен престој како визитинг професор на Катедрата за хуманистички науки.
Во рамките на престојот, д-р Гиревска одржа предавања, семинари и работилници на додипломските и последипломските студии, активно учествуваше во научноистражувачката работа на Универзитетот и оствари бројни средби со професори, истражувачи и студенти. Универзитетот во Мачерата, основан во 1290 година, е еден од најстарите и најреномираните универзитети во Европа.
На 21 и 22 април 2026 година, д-р Гиревска одржа предавања и на последипломските студии на Универзитетот за странци во Перуџа, Умбрија (Università per Stranieri di Perugia), на тема „Tall Tales and Tight Minds: Inside Joyce’s Cyclops“ („Грандиозни приказни и тесногради умови: во светот на Џојсовите Киклопи“).
Во соработка со проф. д-р Џулија Бруна од Универзитетот во Мачерата, на 28 април 2026 година беше организиран првиот од серијата семинари посветени на ирската книжевност, насловен „Female Vampires, Ghosts, and Neanderthals in 19th- and 21st-Century Irish Literature“ („Женски вампири, духови и неандерталци во ирската книжевност од XIX и XXI век“). Семинарот ги истражуваше различните облици и трансформации на женската готика во најзначајните дела од XIX и XXI век. Во рамките на семинарот, д-р Гиревска го претстави своето истражување за романот „Кармила“ (1872) од Шеридан Ле Фану и викторијанските раскази за духови, со посебен осврт на нивните современи интерпретации, преку излагањето насловено „Haunting Desire: Female Vampirism and the Uncanny in Carmilla“ („Прогонувачка желба: женскиот вампиризам и морничавото во Кармилa“).
Вториот семинар, одржан на 22 мај 2026 година, под наслов „Joyce in Motion: Reading and Translation as Dialogue“ („Џојс во движење: читањето и преводот како дијалог“), беше посветен на предизвиците и богатството на читањето и преведувањето на творештвото на Џејмс Џојс, со учество на меѓународни експерти и преведувачи од ирскиот, италијанскиот и македонскиот културно-јазичен простор, меѓу кои проф. д-р Џон МекКорт, ректор на Универзитетот во Мачерата и претседетел на Меѓународната фондација „Џејмс Џојс“, како и д-р Марија Гиревска, преведувач на романот „Улис“, новелата „Џакомо Џојс“ и пиесата „Изгнаници“ на македонски јазик.
На 8 јуни 2026 година, д-р Гиревска учествуваше и во реализацијата на Интензивниот модул на ERUA, под раководство на проф. Ирене Занот и проф. Џузепина Ларока. Активностите во рамките на модулот придонесоа за поттикнување интердисциплинарна дискусија и академска размена меѓу студентите, истражувачите и наставниот кадар. Во рамките на модулот, д-р Гиревска го одржа предавањето „Voices of the Unspoken: From Stream of Consciousness and Automatic Writing to Florentina Holzinger’s Speaking Body“ („Гласовите на неискажаното: од текот на свеста и автоматското пишување до телото што говори кај Флорентина Холцингер“), во кое ги разгледа современите пресечни точки меѓу теологијата, ирската книжевност, францускиот надреализам, теоријата на преводот, родовите студии и студиите на перформансот. Со ова предавање таа придонесе кон продлабочување на критичкиот дијалог и унапредување на интердисциплинарниот пристап во истражувањето и наставата.
Особено значајно е што, во рамките на програмата за мобилност на меѓународни професори и истражувачи, д-р Гиревска е првиот академски претставник од Македонија кој учествува во оваа престижна иницијатива. Ова претставува значајно меѓународно признание и придонес кон афирмацијата на Православниот богословски факултет „Св. Климент Охридски“ – Скопје при Универзитетот „Св. Кирил и Методиј“ во Скопје, како и на македонската академска заедница.
Стекнатото научно-наставно искуство, воспоставените меѓународни партнерства и иницираните заеднички проекти со Универзитетот во Мачерата претставуваат цврста основа за понатамошно унапредување на академската размена, научноистражувачката соработка и интернационализацијата на високото образование.
Повеќе информации:
- https://www.unimc.it/it/internazionale/visiting-faculty/our-visiting-professors
- https://www.unistrapg.it/en/tall-tales-and-tight-minds-inside-joyces-cyclops
- https://www.instagram.com/p/DXrpSlajGob/
- https://studiumanistici.unimc.it/it/site-news/eventi/eventi-2026/irish-literature-seminar-series-1
https://www.instagram.com/p/DYB46kijLPs/
https://www.instagram.com/p/DXPNZLtjCDX/
https://www.facebook.com/photo/?fbid=1416979956899111&set=a.526437709286678
Текстот го подготви д-р Марија Гиревска
Марија Гиревска со студентите од последипломските студии на Универзитетот за странци во Перуџа, 2026 (лична архива)
Марија Гиревска со Џон МекКорт, ректор на Универзитетот во Мачерата, 2026 (лична архива)
Марија Гиревска, предавање за „Кармила“ од Ш. Л. Фану, Универзитет во Мачерата, 2026 (лична архива)
Професорките Марија Гиревска и Џулија Бруна со студентите на Универзитетот во Мачерата, 2026 (лична архива) (2)
Професорките Марија Гиревска и Џулија Бруна со студентите на Универзитетот во Мачерата, 2026 (лична архива)
Најава за предавање 1
Најава за предавање 2